ستاروں کا قیدی– قسط: 1 – بچوں کا ایک سنسنی خیز سائنس فکشن اور ایڈونچر ناول

ستاروں کا قیدی  –  قسط: 1 –

بچوں کا ایک سنسنی خیز سائنس فکشن اور ایڈونچر ناول

کہکشاؤں کے مسافر اور روشنی کے وارث، ایان، ماہ نور اور ارسلان کی کہانی

تحریر:  مریم افضل

1-3-2025

قسط: 1

یہ کہانی اس وقت شروع ہوئی جب زمین کی سب سے بڑی فلکیاتی تحقیق کے دوران ایک پراسرار ''سگنل'' موصول ہوا۔ یہ سگنل ایک ایسی کہکشاں سے آ رہا تھا جو زمین سے بہت دور تھی اور اسے "ستاروں کا قیدی" کہا جاتا تھا۔

ایان، جو ایک جری اور ہمت والا نوجوان تھا، نے کہا، "ہمیں جاننا ہوگا کہ یہ سگنل کیا ہے، یہ شاید کائنات کےکسی پراسرارراز کی کنجی ہو۔"

ماہ نور، جو علم اور حکمت میں ممتاز تھی، نے تحقیق شروع کی، اور ارسلان، جو وفاداری اور طاقت کا مظہر تھا، قافلے کی حفاظت کے لیے تیار ہو گیا۔

باب 1 – راز کا آغاز:

رات کا پچھلا پہر تھا۔ آسمان پر چاند کے گرد ایک عجیب سی روشنی پھیل رہی تھی۔ ارسلان چھت پر لیٹے ہوئےستاروں کو دیکھ رہا تھا۔ اسے ہمیشہ خلا، سیارے اور ان کی پراسرار دنیاؤں سے دلچسپی رہی تھی۔ لیکن اس رات کچھ مختلف  محسوس ہو رہا تھا… جیسے ستارے اسے اپنی طرف بلا رہے ہوں۔

“کاش میں بھی کبھی ان کے درمیان جا سکوں…” اس نے آہستہ سے سرگوشی کرتے ہوئے خود سے کہا۔

اچانک آسمان پر آنکھوں کو چندھیا دینے والی تیز روشنی کا ایک شعلہ سا  لپکا  جس کی روشنی ایک ساعت کے لیے ہر سو پھیل گئی اور ایک ستارہ تیزی سے زمین کی طرف آیا۔ ارسلان گھبرا کر کھڑا ہوا۔ ستارہ زمین پر زیادہ دور نہ گرا بلکہ اس کے گاؤں کے قریب جنگل میں جا ٹکرایا۔ دھماکے کی آواز پورے علاقے میں گونج اٹھی۔

دل میں عجیب سا کھنچاؤ محسوس کرتے ہوئے ارسلان فوراً جنگل کی طرف دوڑ پڑا۔ ہوا میں جلی ہوئی گھاس کی بو پھیلی ہوئی تھی اور دھواں آسمان کی طرف اٹھ رہا تھا۔

جب وہ قریب پہنچا تو دیکھا کہ زمین میں ایک گڑھا بن چکا ہے۔ گڑھے کےدرمیان میں ایک چھوٹا سا شفاف بیج پڑا تھا، جو ہلکی ہلکی نیلی روشنی خارج کر رہا تھا۔

ارسلان نے جھجکتے ہوئے ہاتھ آگے بڑھایا۔ جیسے ہی اس نے بیج کو چھوا، ایک مقناطیسی کرنٹ سا اس کے جسم میں دوڑ گیا۔ 

آنکھوں کے سامنے روشنی پھیل گئی۔ اسے لگا جیسے وہ کائنات کے ہزاروں مناظر ایک ہی لمحے میں دیکھ رہا ہو—کہکشائیں، 

سیارے، اجنبی مخلوقات اور پھر ایک زوردار آواز گونجی

“تم محافظ ہو… یہ بیج اب تمہاری امانت ہے…”

ارسلان پیچھے ہٹ گیا، دل کی دھڑکن بےترتیب اور سانسیں تیز تھیں۔

“تم کون ہو؟ یہ سب کیا ہے؟  وہ خوف زدہ ہو کر چیخا''۔

لیکن جنگل میں صرف جھینگر وں اور ہوا کی سرسراہٹ تھی۔وہ ایک پراسرار  بیج تھا جواب بھی اس کے ہاتھ میں نرم سی دھڑکن کی طرح روشنی دے رہا تھا۔

وہ گڑھے کے کنارے پر بیٹھ گیا اور حیران نگاہوں سے اس پر اسرار  بیج کو دیکھنے لگا۔ دل میں خوف اورتجسس کی ملی جلی کیفیت تھی کیونکہ یہ کوئی عام  بیج نہیں تھا، بلکہ اس میں کسی پراسرار طاقت کا راز پوشیدہ تھا۔ ابھی وہ اس بارے میں سوچ ہی رہا تھا کہ اسی لمحے کسی نے اس کے کندھے پر ہاتھ رکھا۔ ارسلان نے چونک کر پیچھے دیکھا  تو وہاں ماہ نورکھڑی تھی۔ ماہ نوراس کی ہم جماعت تھی جو اکثر گاؤں کی لائبریری سے پرانی کتابوں میں چھپے کائنات کے راز ڈھونڈتی رہتی تھی  اور اسے بہت کچھ معلوم تھا۔

ماہ نور نے ارسلان کے ہاتھ میں بیج دیکھا تو رک گئی۔ اس کی آنکھیں حیرت سے پھیل گئیں،  کیونکہ اس میں سے نکلتی نیلی روشنی ماہ نور نے دیکھ لی تھی جس کے بارے میں وہ بخوبی جانتی تھی۔

“یہ… یہ تو ویسا ہی ہے جیسا پرانی کتابوں میں لکھا تھا…” وہ سرگوشی میں بولی۔

“کیا؟ تم اس کے بارے میں جانتی ہو؟” ارسلان نے تیزی سے پوچھا۔

ماہ نور نے سنجیدگی سے سر ہلایا:

ہاں… ''یہ کوئی عام  بیج نہیں ہےاس میں کائنات کے پراسرار رازوں کے خفیہ کوڈز ہیں۔ کہا جاتا ہے کہ یہ کائنات کی قوتوں کا محافظ ہے  اس میں کائنات کے مقناطیسی طاقتوں کے ایسے پر اسرار راز چھپے ہیں کہ جو اسے پا لیتا ہے، وہ نا صرف روشنیوں کو اپنی جانب کھینچ  لیتا ہے بلکہ اندھیروں کو بھی بے نقاب کر دیتا ہے''۔ 

ارسلان کے ہاتھ پسینے سے بھیگ گئے۔

“تو پھر اب کیا ہوگا؟”

ماہ نور نے ایک لمحے کو خاموش رہ کر گہری سانس لی اورپھر سر گوشی کی، :

“ارسلان …  تمہاری زندگی اب پہلے جیسی نہیں رہے گی۔۔۔۔ تم چیلنجز کی زد میں ہو،  خود کو مضبوط رکھو”

بیج کی روشنی بڑھنے لگی۔ جیسے وہ ارسلان کے دل کی دھڑکن کے ساتھ ہم آہنگ ہو رہا ہو۔ ''اور اس لمحے دونوں کو اندازہ ہوگیا کہ یہ کہانی اب شروع ہوگئی ہے''۔      

باب 2 – بیج کی طاقت:

صبح کے سورج نے گاؤں کو سنہری روشنی میں نہلا دیا۔ مگر ارسلان کے لیے یہ دن کسی عام دن جیسا نہ تھا۔ رات بھر وہ جاگتا رہا، ہاتھ میں اس پراسرار بیج کو تھامے ہوئے۔ بیج اب بھی ہلکی ہلکی روشنی خارج کر رہا تھا، جیسے وہ زندہ ہو۔

کمرے میں داخل ہوتے ہی اس کی ماں نے حیرت سے پوچھا:

“ارسلان، کیاتم پوری رات جاگتے رہے ہو؟ تمہاری آنکھیں سوجی ہوئی اور سرخ ہورہی ہیں۔”

ارسلان نے گھبرا کر بیج کو جیب میں ڈال لیا۔

“جی ماں، بس پڑھائی کر رہا تھا۔”

لیکن دل کی دھڑکن تیز تھی۔ اسے پتا تھا کہ وہ کائنات  کےکسی بڑے راز میں الجھ گیا ہے۔

دوپہر کو وہ ماہ نور سے ملنے کے لیے پرانی لائبریری کے کمرے میں گیا۔ لائبریری کی الماریوں میں گرد جمی کتابیں، پرانے کاغذ اور ٹوٹے ہوئے نقشے پڑے تھے۔

ماہ نور ایک موٹی کتاب کی گرد جھاڑ کر کھولے بیٹھی تھی۔ جیسے ہی ارسلان آیا، وہ جلدی سے اس کے قریب آئی اور آہستگی سے بولی،:

“بیج کہاں ہے؟ مجھے دکھاؤ۔”

ارسلان نے جیب سے بیج نکالا۔ جیسے ہی بیج روشنی دینے لگا، لائبریری کی دیواروں پر عجیب عجیب نشانات ابھرنے لگے۔ دونوں نے حیرت سے دیکھا۔

ماہ نور نے کانپتی آواز میں کہا:

“یہ تو قدیم زبان کے حروف ہیں… جو صرف اس بیج کی طاقت سے ظاہر ہوتے ہیں۔”

ارسلان نے دھڑکتے دل کے ساتھ دیوار کو چھوا۔ اچانک بیج نے ایک روشنی کی لہر خارج کی۔ کمرہ اندھیرے میں ڈوب گیا اور پھر دیوار کے بیچ میں ایک ہولوگرام سا ابھرا—کائنات کا نقشہ، جس میں درجنوں کہکشائیں جگمگا رہی تھیں۔

“یہ… یہ تو کسی خفیہ راستے کا نقشہ لگتا ہے!” ارسلان نے کہا۔

ماہ نور نے نظریں ہولوگرام پر گاڑ دیں:

“نہیں، یہ صرف نقشہ نہیں ہے۔ یہ ایک پیغام ہے۔ دیکھو، یہ نشان!”

ہولوگرام پر ایک سیارہ خاص طور پر چمک رہا تھا۔ اس کے گرد ایک دائرہ بنا ہوا تھا۔

ماہ نور نے آہستگی سے کہا:

“یہ وہ مقام ہے جہاں ‘محافظ’ کو جانا ہوگا۔ اور محافظ… تم ہو، ارسلان۔”

ارسلان کے دل میں خوف اور تجسس کی لہر دوڑ گئی۔

“لیکن کیوں میں؟ میں تو ایک عام لڑکا ہوں۔”

بیج تو جیسے اس جواب سے مزید چمکنے لگا۔ اور اس لمحے ارسلان نے پہلی بار بیج کی اصل طاقت محسوس کی۔ اچانک اس کی
 آنکھوں کے سامنے مستقبل کی جھلکیاں آئیں—روشنیوں کی جنگ، اجنبی مخلوقات، اور ایک سایہ دار قوت جو پوری کائنات کو اندھیرے میں ڈبونے کے درپے تھی۔

وہ پیچھے ہٹ گیا، اس کا سانس پھول رہا تھا۔

“میں نے… میں نے سب کچھ دیکھا… کچھ بہت برا ہونے والا ہے…”

ماہ نور نے اس کے کندھے پر ہاتھ رکھا اور اس کا حوصلہ بڑھایا:

“اس لیے یہ بیج تمہیں ملا ہے۔ یہ تمہارا امتحان ہے، ارسلان۔ لیکن یاد رکھو، اندھیرا ہمیشہ روشنی کو تلاش کرتا ہے۔ تمہیں محتاط رہنا ہوگا۔”
اسی لمحے لائبریری کے باہر کسی کے قدموں کی چاپ سنائی دی۔ دونوں نے چونک کر دروازے کی طرف دیکھا۔ کوئی ان کا پیچھا کر رہا تھا۔
ماہ نور نے تیزی سے سرگوشی کی:
“ارسلان، بیج چھپا لو… شاید وہ آ گئے ہیں!”

باب 3 – تعاقب:

لائبریری کے کمرے میں خوف پھیل چکا تھا۔  قدموں کی چاپ قریب آتی جا رہی تھی۔ ارسلان نے جلدی سے بیج جیب میں

 ڈالا اور ماہ نور کے ساتھ اندھیرے کونے میں دبک گیا۔ دروازہ آہستگی سے چرچراتا ہوا کھلا۔

اندر ایک لمبے چوڑےقد کا، کالے چوغے میں ملبوس شخص داخل ہوا۔ اس کی آنکھیں سرخ انگاروں کی طرح دہک رہی تھیں۔ 

وہ آہستہ آہستہ چلتے ہوئے دیواروں کو چھونے لگا، جیسے کسی خاص چیز کو تلاش کر رہا ہو۔ارسلان نے بمشکل اپنی سانس روکی۔ مگر بیج نے اس کی جیب میں ہلکی سی روشنی پیدا کی، اور روشنی  کی یہ  مدھم کرن باہر جھانکنے لگی جسے اس شخص نے دیکھ  لیا  تھا۔

“کون ہے وہاں؟”

کالے چوغے والے نے گرجدار آواز میں کہا۔

ماہ نور نے ارسلان کا ہاتھ مضبوطی سے پکڑا اور سرگوشی کی کہ  “ بیج تمہارے قابو میں رہنا نہیں چاہتا… ہمیں نکلنا ہوگا!”

کمرے کے پیچھے ایک خفیہ راستہ تھا جس کے بارے میں صرف ماہ نور جانتی تھی۔ وہ ارسلان کو وہاں لے گئی۔ دونوں دبے 

قدموں سے دروازے کے پیچھے دیوار کے ساتھ جا لگے۔ ماہ نور نے پرانی لکڑی کو دبایا تو ایک تنگ راہداری کھل گئی۔

لیکن ابھی وہ اندر داخل ہوئے  ہی تھے کہ وہ سرخ آنکھوں والا شخص جھپٹ کر  ان کےپیچھے آ گیا کیونکہ وہ ان دونوں کو دیکھ چکا تھا۔

“تم دونوں! بیج میرے حوالے کرو!”

راہداری اندھیری اور تنگ تھی۔ ارسلان کا دل دھڑک رہا تھا، مگر بیج جیسے خود ہی اپنی طاقت استعمال کر رہا تھا۔ اچانک 

راہداری کی دیواریں چمکنے لگیں اور روشنی کی ایک لہر پھیل گئی۔ اس روشنی نے ان دونوں کو باہر کی طرف دھکیل کر کھلی 

زمین پر لا پھینکا۔

وہ دونوں گھاس پر گرے، اور پیچھے راہداری کی دیوار بند ہوگئی۔ سرخ آنکھوں والا شخص پیچھے رہ گیا، مگر اس کی گرجتی ہوئی آواز 

اب بھی گونج رہی تھی:

“تم بچ نہیں سکتے، محافظ!”

رات کی ہوا تیز تھی۔ گاؤں کی گلیاں سنسان اور ساکت۔ ارسلان اور ماہ نور بھاگتے ہوئے کھیتوں کی طرف نکلے۔

“یہ کون تھا؟” ارسلان نے ہانپتے ہوئے پوچھا۔

ماہ نور نے آنکھوں میں خوف اور پریشانی لیے کہا:

“یہ سایہ دار قوت کا خادم ہے۔ اسے ‘شکارچی’ کہتے ہیں۔ جہاں بیج ہوگا، وہاں یہ ضرور پہنچ جائے گا۔”

ارسلان نے مٹھیاں بھینچ لیں۔

“اگر یہ بیج واقعی کائنات میں ہونے والی تباہی سے بچانے کی کنجی ہے… تو میں پیچھے نہیں ہٹوں گا۔ لیکن ہمیں کسی محفوظ جگہ جانا ہوگا۔”

ماہ نور نے اثبات میں سر ہلایا:

“ہاں۔ لیکن یاد رکھو، اکیلے ہم کچھ نہیں کر سکتے۔ ہمیں ساتھیوں کی ضرورت ہے۔ اور میں جانتی ہوں کہ پہلا ساتھی کہاں ملے گا…”
ارسلان چونک گیا:

“کون؟”

ماہ نور نے آسمان کی طرف دیکھا، جہاں ستارے ٹمٹما رہے تھے۔

“ایک لڑکا… جس کا دل لوہے کی طرح مضبوط ہے۔ وہ ہمارا انتظار کر رہا ہے۔ اس کا نام ہے… ایان!”

اگلی قسط جاری ہے۔۔۔

اگلی قسط پڑھنے کے لیے یہاں کلک کریں:

ستاروں کا قیدی– قسط: 2

آپ کی رائے:

یہ کہانی آپ کو کیسی لگی؟ نیچے کمنٹ بکس میں اپنی رائے دیں۔ لائک کریں اور شیئر کریں!