ستاروں کا قیدی– قسط: 2 –

بچوں کا ایک سنسنی خیز سائنس فکشن اور ایڈونچر ناول

کہکشاؤں کے مسافر اور روشنی کے وارث، ایان، ماہ نور اور ارسلان کی کہانی

تحریر: مریم افضل

2-3-2025

قسط: 2

باب 4 – نیا ساتھی:

رات کا اندھیرا ابھی پوری طرح چھٹا نہیں تھا۔ گاؤں کے کنارے پر ہوا میں نمی اور خاموشی کی ملی جلی کیفیت پھیلی ہوئی تھی۔ ارسلان اور ماہ نور کچی راہ سے گزر تے کھیتوں کے پار جا رہے تھے۔ کہیں کہیں سے کتوں کے بھونکنے کی آوازیں آ رہیں تھیں، مگر ان کے قدم رکنے کا نام نہیں لے رہے تھے۔

“ہم کہاں جا رہے ہیں؟” ارسلان نے آخرکار سوال کر ہی لیا۔

ماہ نور نے گردن موڑ کر آہستہ سے کہا:

“قریبی قصبے میں۔ وہاں ایک لڑکا ہے… ایان۔ وہ کوئی عام لڑکا نہیں ہے بلکہ بہت بہادر اور فولاد کی طرح مضبوط اعصاب کا مالک ہے۔ اس کا دل اور دماغ دونوں سخت آزمائشوں سے گزرے ہیں۔ وہی ہمارا پہلا ساتھی بن سکتا ہے۔”

ارسلان نے بھنویں چڑھائیں۔

“لیکن وہ ہماری مدد کیوں کرے گا؟”

ماہ نور کے چہرے پر ایک پراعتمادمسکراہٹ ابھری۔

“کیونکہ وہ خود بھی ایک سوال کا جواب ڈھونڈ رہا ہے۔ اور اس کا جواب صرف اس سفر میں چھپا ہے جس پر ہم جا رہے ہیں اس لیے وہ ہماری مدد ضرور کرے گا۔”

پہلی قسط پڑھنے کیلئے یہاں کلک کریں:

ستاروں کا قیدی– قسط: 1

ایان کی کہانی:

قصبہ زیادہ دور نہ تھا۔ وہاں کے کچےمکانات، تنگ گلیاں، لوگوں کی غربت اورسادہ ززندگی کا ثبوت تھی۔ وہاں ایک مکان باقی سب سے الگ نظر آرہا تھا۔ اس کے باہر کی ٹوٹی ہوئی دیوار اور اندر بھاری بھرکم لوہے کا سامان بکھرا ہوا تھا۔

یہ ایان کا گھر تھا۔ ایان جوان تھا، مضبوط بازوؤں والا، مگر اس کی آنکھوں میں ایک گہری چمک تھی۔ وہ اپنی ورکشاپ میں پرانے پرزوں سے نئی چیزیں بناتا رہتا تھا۔ چھوٹے موٹے روبوٹ، خودکار اوزار، اور کبھی کبھی ایسی مشینیں جو لوگوں کو حیران کر دیتی تھیں۔

لیکن اس کی زندگی عام لوگوں کی طرح نہ تھی۔ سالوں پہلے اس کے والد ایک پراسرار حادثے میں غائب ہو گئے تھے جن کا پتہ نہ چل سکا۔

تب سے ایان کے دل میں یہ سوال سلگ رہا تھا:

“میرے والد کہاں گئے؟”

ملاقات:

صبح کی روشنی پھیل چکی تھی جب ارسلان اور ماہ نور ایان کے دروازے پر پہنچے۔

ایان ورکشاپ میں بیٹھا ایک چھوٹا سا ڈرون ٹھیک کر رہا تھا۔ جیسے ہی اس نے اجنبی قدموں کی آہٹ سنی، اس نے اوزار ایک طرف رکھے اور چونک کر ان دونوں کی جانب دیکھا۔

“کون ہو تم ؟” اس نے سخت لہجے میں کہا۔

ارسلان کچھ کہنے ہی والا تھا کہ ماہ نور آگے بڑھی اور بولی

“ہم مسافر ہیں… اور تمہاری ہی تلاش میں آئے ہیں۔”

ایان تلخ سی ہنسی ہنسا اور حیرانگی سے بولا،

“میری تلاش لیکن کیوں ؟ ”

میں تم لوگوں کونہیں جانتا ،اور نہ ہی تمہارے آنے کا مقصد، اور نہ ہی میں کسی کے جھمیلے میں پڑتا ہوں۔

اسی لمحے ارسلان کی جیب میں بیج ہلکی سی روشنی سے جگمگایا جسے دیکھ کر ایان کی آنکھیں حیرت سے کھل گئیں۔

“یہ… یہ کیا ہے تمہارے پاس؟”

''ارسلان نے دھیرے سے کہا کہ یہ ایک پر اسرار راز ہے جس کا بھیدتلاش کرنے ہم تمہارے پاس آئے ہیں''۔

یہ کہ کر ارسلان نے وہ بیج جیب سے نکا ل کر ایان کے ہا تھ پر رکھ دیا:

''بیج کو دیکھتے ہی ایان چلایا''

“یہ… یہ بیج تمہارے پاس کہاں سے آیا؟ ”

“یہ تمہارا نہیں ہے، یہ تو میرے والد کے پاس تھا جسے انہوں نے کھو دیا۔

ہوں، لگتا ہے تم اسے پہچانتے ہو؟ ارسلان نے استفسار کیا۔”

ایان خاموش ہو گیا۔ اس کی آنکھوں میں وہی درد ابھرا جو برسوں سے چھپا ہوا تھا۔

“ہاں… میرے والد بھی کبھی ایسا ہی بیج تلاش کر رہے تھے۔ اور پھر ایک دن اچانک… وہ غائب ہو گئے۔”

ماہ نور نے نرمی سے کہا:

“ایان، یہ سفر صرف ارسلان یا میرے لیے نہیں ہے۔ بلکہ یہ تمہارے سوال کا جواب بھی دے سکتا ہے۔ اگر تم چاہو اورہمارا ساتھ دو، تو شاید تمہیں اپنے والد کا سراغ مل جائے۔”

ایان نے گہری سانس لی، پھر اپنے ہاتھ بیج کی روشنی پر رکھا جیسے اس کی دھڑکن سن رہا ہو۔ کچھ لمحے بعد اس نے فیصلہ کر لیا۔

“ٹھیک ہے۔ میں تمہارے ساتھ ہوں۔ لیکن یاد رکھو… میں یہ سب اپنے والد کے لیے کر رہا ہوں۔”

ارسلان نے مسکرا کر ہاتھ بڑھایا۔

"بس یہی ہمیں چاہیے تھا… ایک نیا ساتھی۔"

ایان نے ارسلان کا ہاتھ مضبوطی سے تھاما۔ اور یوں یہ تینوں اپنی پہلے مشترکہ مشن کے آغاز پر نکل کھڑے ہوئے۔

باب5 – تعاقب کی واپسی:

قصبے کی سرحد سے نکلتے وقت تینوں — ارسلان، ماہ نور اور ایان — خاموش تھے۔ راستہ سنسان تھا اور صبح کی ہلکی روشنی میں پہاڑوں کا عکس دھندلا سا نظر آ رہا تھا۔ ایان کے کندھے پر ایک چھوٹا سا بیگ تھا جس میں اس نے اپنے اوزار اور چند ضروری سامان ڈال رکھا تھا۔ ارسلان بار بار بیج کی طرف دیکھتا، جو کبھی مدھم اور کبھی تیز روشنی سے دھڑکنے لگتا۔

ماہ نور نے آہستگی سے کہا:

“یہ خاموشی طوفان سے پہلے کا سکوت ہے۔ دشمن جلد ہی ہمیں ڈھونڈ نکالے گا۔”

ارسلان چونکا۔

“کون سا دشمن؟ تم نے پہلے تو ذکر نہیں کیا ۔”

ماہ نور نے تلخی سے سر جھکا لیا اور آہستہ سے بولی کہ، وہ لوگ جو بیج کی طاقت کے پیچھے ہیں۔ ان کا صرف ایک ہی مقصد ہے — ہر اُس انسان کو ختم کرنا جو بیج کی چھپی طاقتوں کو جان کراسےاستعمال کر سکے۔”

ایان نے تیز لہجے میں کہا:

“اور وہ کون ہیں؟”

ماہ نور نے صرف ایک لفظ کہا:

“شکارچی۔”

سایوں کی واپسی:

وہ سب ابھی پہاڑی درے میں داخل ہوئے ہی تھے کہ اچانک ہوا کا جھونکا تیز ہوا، گرد اڑنے لگی اور فضا میں عجیب سا دباؤ بڑھ گیا۔ ایان کے ڈرون نے خود بخود سنسناہٹ کی آواز نکالی جیسے کسی طاقتور مقناطیس نے اسے کھینچ لیا ہو۔

ارسلان نے گردن گھما کر پیچھے دیکھا۔ درے کے دہانے پر سیاہ لباس میں ملبوس لمبے قد کا ایک شخص کھڑا تھا۔ اس کے چہرے پر نقاب تھا، مگر آنکھوں سے سرخ روشنی جھانک رہی تھی۔

“وہ آ گیا…” ماہ نور کے ہونٹوں سے دھیما سا جملہ نکلا ''شکارچی!

پہلی جھڑپ:

شکارچی نے اپنا ہاتھ اٹھایا۔ فضا میں ہلکی سی کڑکڑاہٹ ہوئی اور اچانک ایک دھماکے کے ساتھ پتھر زمین پر جا گرے۔ اس کی طاقت عام انسان سے کہیں زیادہ تھی۔

“بیج… مجھے دے دو۔” اس کی آواز دھات کی طرح ٹھنڈی اور بےرحم تھی۔

ایان نے بیج کو مٹھی میں دبایا۔

“یہ میرا ہے۔ میرے والد کی نشانی۔ تمہیں نہیں ملے گا۔”

شکارچی نے قہقہہ لگایا، “نشانی “

یہ بیج تمہارے خون کی قیمت ہے۔ اور میں وہ شکاری ہوں جو تم جیسے شکاریوں کے خون کا پیاسا ہے، ہاہاہا۔”

ایان نے آگے بڑھ کر اپنی جیب سے ایک چھوٹا سا آلہ نکالا۔ اس نے بٹن دبایا اور ایک چھوٹا ڈرون شکارچی کے سامنے جا کر چمکنے لگا۔ ڈرون نے روشنی کا ایک تیز فلیش چھوڑا جس سے لمحہ بھر کے لیے شکارچی کی آنکھیں چمک سے چندھیا گئیں۔

“بھاگو!” ایان زور سے چلایا۔

تعاقب:

تینوں تیزی سے درے کی دوسری طرف بھاگنے لگے۔ پتھر لڑھکتے، ہوا تیز چلتی اور شکارچی کے قدموں کی گونج ان کے پیچھے ایک گرج کی طرح بڑھتی جا رہی تھی۔

ایان کے کانوں میں صرف ایک ہی آواز گونج رہی تھی: “بیج مجھے دو…”

لیکن وہ جانتا تھا کہ اگر اس نے ہتھیار ڈال دیے تو نہ صرف وہ، بلکہ اس کے نئے ساتھی بھی ہمیشہ کے لیے فنا ہو جائیں گے۔

عہد:

جب وہ پہاڑ کے پار پہنچے تو سب کے سانس پھول چکے تھے۔ شکارچی کا سایہ دور اندھیرے میں غائب ہو گیا تھا مگر خطرہ ابھی ختم نہیں ہوا تھا۔

ایان نے ارسلان کی طرف دیکھا:

“اب مجھے یقین ہو گیا کہ یہ سفر کھیل نہیں ہے۔ یہ ایک جنگ ہے۔ اور میں پیچھے نہیں ہٹوں گا۔”

ماہ نور نے بیج کی روشنی کو دیکھتے ہوئے کہا:

“یہ صرف آغاز ہے۔ اصل دشمن ابھی سامنے نہیں آیا۔ شکارچی تو محض بھیجا ہوا ایک پیادہ ہے۔”

ارسلان نے دونوں ساتھیوں کی طرف دیکھا، اور پہلی بار دل میں عہد کیا:

“چاہے کچھ بھی ہو جائے، میں بیج کو غلط ہاتھوں میں نہیں جانے دوں گا۔ یہ میرا وعدہ ہے۔”

باب 6 – پراسرار نقشے کا سراغ:

رات کے اندھیرے میں پہاڑوں کے بیچ ایک غار کے دہانے پر تینوں تھکے ہوئے بیٹھے تھے۔ آگ جل رہی تھی اور شعلوں کی لپک کے ساتھ بیج کی روشنی بھی مدھم مدھم سانس لیتی محسوس ہو رہی تھی۔ ارسلان نے اسے کھول کر زمین پر رکھا تو بیج اچانک تیزی سے دھڑکنے لگا۔

روشنی غار کی دیوار پر جا گری۔ لیکن یہ روشنی سیدھی نہیں تھی، بلکہ ایک عجیب سا نقشہ بنا رہی تھی ۔ دیوار پر پہاڑ، دریا اور بیچ میں ایک نشان ابھرا — جیسے کوئی درخت یا ستون۔

ایان نے حیرت سے کہا:

“یہ… ہولوگرافک پروجیکشن ہے۔ مگر بیج کے اندر تو کوئی مشینری نظر نہیں آتی۔”

ماہ نور نے سنجیدگی سے کہا:

“یہ مشین نہیں، یہ یادداشت ہے۔ صدیوں پرانی۔ بیج صرف اس راز کو محفوظ رکھتا ہے جس تک عام انسان نہیں پہنچ سکتے۔”

خفیہ نشان:

نقشے میں ایک مقام چمکنے لگا، جو موجودہ پہاڑوں سے بہت دور تھا۔ وہ جگہ ایک ویران صحرا کے بیچوں بیچ تھی، جہاں ایک چھپی ہوئی عمارت یا شاید قلعے جیسا کچھ بنا ہوا تھا۔

ارسلان نے بےچینی سے پوچھا:

“یہ جگہ کہاں ہے؟ میں نے کبھی ایسا مقام پہلےنہیں دیکھا۔”

ایان نے فوراً اپنا ڈیجیٹل پیڈ نکالا اور دیوار پر بنے نقشے کی تصویر کھینچ لی۔ پھر اس نے اپنی سکرین پر موجود جغرافیائی ڈیٹا سے موازنہ شروع کیا۔ چند لمحوں بعد اس نے سر اٹھایا۔

“یہ جگہ اصل دنیا میں موجود ہے۔ اور میرا خیال ہے… یہ خاموش صحرا ہے۔”

ماہ نور نے چونک کر کہا:

“وہی جگہ جہاں قدم رکھنے والا کوئی زندہ واپس نہیں آتا؟”

راز کی گہرائی:

بیج کی روشنی ایک بار پھر تیز ہوئی اور دیوار پر دوسرا منظر ابھرا۔ اس بار وہاں، قدیم زبان میں ایک لمبی تحریر لکھی تھی ۔

ایان نے اس کی طرف دیکھ کر کہا:

“میں یہ زبان جانتا ہوں۔ یہ میرے والد نے مجھے بچپن میں سکھائی تھی۔”

اس نے دھیرے دھیرے ترجمہ کیا:

“جس کے پاس یہ بیج ہو، وہ ستونِ نور کو تلاش کرے۔یہ وہی مقام ہے جہاں آسمان اور زمین کا دروازہ کھلتا ہے۔ لیکن خبردار… شکاری تم سے پہلے وہاں پہنچنے کی کوشش کرے گا۔”

یہ الفاظ سن کر سب کے جسم میں سنسنی دوڑ گئی۔

جاری ہے۔۔۔