ستاروں کا قیدی – قسط: 3 –

بچوں کا ایک سنسنی خیز سائنس فکشن اور ایڈونچر ناول

کہکشاؤں کے مسافر اور روشنی کے وارث، ایان، ماہ نور اور ارسلان کی کہانی

تحریر: مریم افضل

3-3-2025

قسط: 3

نیا عزم:

ایان نے سخت لہجے میں کہا:

“تو اب ہمیں دیر نہیں کرنی چاہیے۔ اگر شکاری کو خبر مل گئی تو وہ ہم سے پہلے پہنچ جائے گا۔”

ماہ نور نے ارسلان کی طرف دیکھا:

“یہ سفر آسان نہیں ہوگا۔ خاموش صحرا میں نہ صرف فطری خطرات ہیں، بلکہ وہاں وہ قوتیں بھی بیدار ہیں جو انسان کو پہچان لیتی ہیں۔ اگر دل کمزور ہوا تو واپسی ممکن نہیں۔”

ایان نے بیج کو اپنے سینے سے لگا لیا۔

“میرے پاس کھونے کو کچھ نہیں رہا۔ اگر یہ بیج میرے والد کی نشانی ہے تو میں اس کے راز تک ضرور پہنچوں گا۔ چاہےاس کے لیے مجھےاپنی جان بھی کیوں نہ دینی پڑے۔”

بیج کی روشنی مزید تیز ہو گئی، جیسے اس عہد کو سن کر جواب دے رہی ہو۔

روانگی:

صبح ہوتے ہی تینوں نے اپنی چھوٹی سی آگ بجھائی اور سفر کے لیے کمر کس لی۔ پہاڑ پیچھے رہ گئے اور سامنے ایک لمبا، سنہرا صحرا پھیلتا جا رہا تھا۔

وہاں سے ان کا اصل امتحان شروع ہونا تھا۔

دور کہیں ریت کے طوفان کے پیچھے، ایک اور سایہ حرکت کر رہا تھا۔

پچھلی قسط پڑھنے کے لیے یہاں کلک کریں!

ستاروں کا قیدی– قسط: 2

باب 7 – خاموش صحرا کی آزمائشیں؛

شکاری!

سورج کی تیز دھوپ صحرا کے سنہری ذروں کو آگ کے شعلوں کی طرح بھڑکا رہی تھی۔ ارسلان، ایان اور ماہ نور جب پہاڑوں سے نکل کر اس بے کنار ریت کے سمندر میں داخل ہوئے تو ہر طرف بس سنّاٹا اور ہوا کی چیخ سنائی دیتی تھی۔ کوئی چرند پرند، کوئی درخت، پودا، کچھ بھی نہیں ، گویا کہ زندگی کے کوئی آثار نہیں تھے۔

ایان نے پسینے سے تر چہرہ صاف کرتے ہوئے کہا:

“یہ جگہ تو گویا موت کی آغوش ہے۔ نہ پانی ہے، نہ سایہ۔ ہم یہاں کتنی دیر زندہ رہ سکتے ہیں؟”

ماہ نور نے بیج کی مدھم روشنی کی طرف اشارہ کیا:

“یہی روشنی ہماری رہنمائی کرے گی۔ لیکن یاد رکھو، یہ صحرا صرف زمین کا نہیں، ذہن کا بھی امتحان ہے۔ جو کمزور پڑ گیا، وہ خود اپنے خوف میں دفن ہو جائے گا۔”

سراب یا حقیقت؟

چند گھنٹوں کے سفر کے بعد ارسلان نے دور ایک جھلملاتا سا سایہ دیکھا۔ وہ رک گیا اور چیخ کر بولا:

“دیکھو! وہاں پانی ہے… ایک نخلستان!”

ایان بھی لپکا لیکن ماہ نور نے دونوں کو روکا۔

“یہ صحرا دھوکہ دیتا ہے۔ جو تم دیکھ رہے ہو، وہ شاید حقیقت نہ ہو۔”

مگر ارسلان کے قدم بے قابو ہو گئے۔ وہ آگے بڑھا تو اچانک زمین اس کے نیچے کانپنے لگی۔ ریت گول گھومنے لگی اور ایک بڑے بھنور کی شکل اختیار کر گئی۔ ارسلان پھسل کر اس میں گرنے ہی والا تھا کہ ایان نے فوراً رسی پھینک کر اسے کھینچ لیا۔

ارسلان ہانپتے ہوئے زمین پر گرا۔

“یہ کیا تھا؟”

ماہ نور نے سرد لہجے میں کہا:

“یہ صحرا زندہ ہے۔ یہ تمہاری خواہشوں اور کمزوریوں کو پہچان کر جال بچھاتا ہے۔”

ریت کے مجسمے:

اگلی رات جب وہ ایک ٹیلے کے پاس رکے تو ریت اچانک حرکت کرنے لگی۔ ذرات نے انسانی شکل اختیار کی۔ وہ لمبے، سائے جیسے پیکر تھے، جن کی آنکھوں میں سرخ روشنی جل رہی تھی۔

ایان نے اپنی لیزر گن سنبھال لی۔

“یہ کیسی مخلوق ہے؟”

ماہ نور نے بیج کو اونچا کیا۔ روشنی کی کرن پھیلی تو وہ سائے پیچھے ہٹنے لگے۔

“یہ محافظ ہیں۔ جو ستونِ نور کے قریب جانے کی کوشش کرے، انہیں پہلے ان سے گزرنا پڑتا ہے۔”

لیکن ایک سایہ ارسلان کی طرف لپکا۔ ارسلان نے اپنی لیزر گن نکالی اور پوری طاقت سے وار کیا۔ ریت کا وہ پیکر بکھر گیا لیکن فوراً پھر سے جڑنے لگا۔

ماہ نور چلائی:

“انہیں ہتھیار سے نہیں مار سکتے! صرف بیج کی روشنی ہی ان کی کمزوری ہے۔”

ایان نے بیج کو اوپر اٹھایا اور پوری قوت سے کہا:

“ہمیں آگے بڑھنے دو! ہم دشمن نہیں محافظ ہیں۔”

بیج کی روشنی اور تیز ہو گئی۔ سایوں نے ایک زوردار چیخ ماری اور پھر دھیرے دھیرے صحرا میں تحلیل ہو گئے۔

سرگوشیوں کا امتحان:

رات گہری ہونے لگی۔ اچانک ایان نے اپنے کانوں میں ایک مانوس آواز سنی — اس کے والد کی آواز:

“بیٹے… واپس لوٹ آؤ۔ یہ سفر تمہارا نہیں۔”

ایان کے دل میں لرزہ طاری ہوا۔ آنکھوں میں آنسو آگئے۔

“ابا… کیا یہ واقعی آپ ہیں؟”

لیکن اسی لمحے ماہ نور نے اس کے کندھے پر ہاتھ رکھا۔

“نہیں ایان۔ یہ صحرا تمہارے دل کے زخموں کو استعمال کر رہا ہے۔ اگر تم نے کمزوری دکھائی تو یہ تمہیں نگل لے گا۔”

ایان نے دانت بھینچ لیے اور بیج کو سینے سے لگا لیا۔ آواز دھیرے دھیرے غائب ہو گئی۔

آگے کا سفر:

تینوں نے کئی دن اور راتیں اس بے رحم صحرا میں گزاریں۔ ان کے قدم لڑکھڑانے لگے لیکن بیج کی روشنی ہر بار ان کا حوصلہ بڑھاتی۔ آخرکار ایک دن، انہوں نے دور ایک سیاہ عمارت کا ڈھانچہ دیکھا۔ وہ ایک عمارت تھی جو آدھی ریت میں دھنسی ہوئی تھی۔

ارسلان نے پرجوش ہو کر کہا:

“وہاں… وہی ہے! ستونِ نور کا مقام!”

لیکن جیسے ہی وہ آگے بڑھے، افق پر ایک اور قافلہ نمودار ہوا۔

ریت اڑتی ہوئی اٹھ رہی تھی اور درمیان میں ایک سیاہ زرہ بکتر پوش شخص گھوڑے جیسے عجیب و غریب جانور پر سوار تھا۔

ماہ نور نے سخت لہجے میں کہا:

“وہ… شکاری ہے۔”

باب8 – شکاری کا سامنا

ریت کے طوفان میں لپٹے ہوئے وہ سوار قافلہ قریب آتا گیا۔ اس کے آگے آگے ایک دیو قامت گھوڑے جیسا جانور تھا جس کی کھال سیاہ دھات کی طرح چمک رہی تھی اور آنکھیں انگاروں کی طرح دہک رہی تھیں۔ اس کے اوپر ایک شخص سوار تھا، زرہ بکتر میں لپٹا ہوا، چہرہ سیاہ نقاب سے ڈھکا، اور ہاتھ میں لمبا سا بھالا تھا جس کی نوک پر نیلی آگ جل رہی تھی۔

ماہ نور کی آنکھوں میں خوف کی جھلک تھی لیکن آواز مضبوط رہی:

“وہی ہے… شکاری۔ قدیم وقتوں کامحافظ ، جو ستونِ نور تک پہنچنے والوں کو روکنے کے لیے صدیوں سے بھٹکتا ہے۔”

پہلی جھڑپ:

شکاری نے اپنی بھاری آواز میں للکارا:

“تم لوگ واپس چلے جاؤ۔ یہ راستہ تمہارے لیے نہیں ہے۔”

ایان آگے بڑھا اور بلند آواز میں بولا:

“ہمیں کوئی نہیں روک سکتا۔ ہم انسانیت کو بچانے آئے ہیں!”

ایان نے لیزر گن سے فائر کیا۔ لیکن اس کی شعائیں شکاری کی زرہ بکتر سے ٹکرا کر غائب ہو گئیں۔ شکاری نے ایک خوفناک، گونجدار قہقہہلگایا۔ پھر اس نے بھالا لہرایا اور ریت کا طوفان کھڑا کر دیا۔

ارسلان اور ماہ نور نے آنکھیں ڈھانپ لیں۔ جب دھول چھٹی تو ایان زمین پر گرا ہوا تھا اور اس کی لیزر گن کے دو ٹکڑے ہو گئے۔

''ارسلان بیج کی حفاظت کرو'' ماہ نور زور سے چلائی

ارسلان فوراً ایان کی طرف لپکا اور بیج اس کے ہاتھ سے جھپٹ لیا ، اس سے پہلے کہ شکاری ایان پر حملہ کرتا ، ارسلان نے بیج کی ہلکی سی روشنی ایان کے چہرے پر ڈالی جس سے وہ فوراً ہوش میں آ کر کھڑا ہوگیا۔

ارسلان کا حوصلہ:

شکاری نے ارسلان کی طرف دیکھا اور کہا:

“بیج میرے حوالے کر دو، ورنہ تم سب اسی صحرا میں دفن ہو جاؤ گے۔”

ارسلان نے بیج کو مضبوطی سے پکڑ لیا۔ اس کے اندر ایک عزم کی لہر اٹھی۔

“یہ بیج تمہارے ظلم کے لیے نہیں، روشنی کے لیے ہے۔ ہم پیچھے نہیں ہٹیں گے۔”

بیج نے جیسے اس کے دل کی بات سن لی۔ روشنی پہلے سے زیادہ تیز ہو گئی۔ شکاری نے آنکھیں تنگ کر لیں، جیسے یہ روشنی اس کے لیے اذیت ناک ہو۔

راز کھلنے لگا:

ماہ نور نے اچانک چیخ کر کہا:

“ارسلان! اس روشنی کو اس پر مرکوز کرو۔ یہ روشنی صرف دشمن کو صرف روکتی نہیں بلکہ اس کی حقیقت بھی کھول دیتی ہے۔”

ارسلان نے بیج کو اوپر اٹھایا۔ شعاع سیدھی شکاری پر پڑی۔ دھوئیں کی طرح نقاب کے ٹکڑے پگھلنے لگے۔ اور سب کے سامنے ایک چہرہ ظاہر ہوا — انسانی چہرہ، زخمی اور تھکا ہوا۔

ایان نے ہکّا بکّا ہو کر کہا:

“یہ… یہ تو انسان ہے!”

شکاری نے غرّاتے ہوئے کہا:

“ہاں… کبھی میں بھی انسان تھا۔ لیکن ستونِ نور نے مجھے اپنی حفاظت کے لیے قید کر لیا۔ صدیوں کی تنہائی نے مجھے یہ روپ دیا۔ اب میرا مقصد صرف ایک ہے — کسی کو آگے نہ بڑھنے دینا۔”