دوستی کا جنگل- ایک بہت ہی پیاری صبح اورالٹا لٹکا ہوا کیلا

دوستی کا جنگل- ایک بہت ہی پیاری صبح اورالٹا لٹکا ہوا کیلا(مدد مانگنے کی ہمت)

دوستی کا جنگل  سیریز- مہربانی اور امن کا سفر - (جہاں پھل، جانور اور پرندے دوست بن کر رہنا سیکھتے ہیں)

ایک جادوئی دنیا جہاں دوستی، محبت، ہنسی، امید، خوشی اور مہم جوئی کی  دلچسپ، مزاحیہ اور دل کو چھو لینے والی کہانیاں ہر جگہ بکھری پڑی ہیں۔

مصنفہ: مریم افضل

Jun 3, 2026

ایک بہت ہی پیاری صبح… اور الٹا لٹکا ہوا کیلا!

جنگل کا سکون اور ایک زوردار چیخ!

دوستی کے جنگل میں ایک پیاری سی صبح تھی۔ سورج چمک رہا تھا ،  چڑیاں میٹھے گیت گا رہی تھیں ، اور درختوں کے پتے ٹھنڈی ہوا میں جھوم رہے تھے۔ جنگل کے تمام جانور بہت خوش تھے!

لیکن پھر اچانک… ایک زوردار چیخ کی آواز آئی—

"بچاؤ! بچاؤ! کوئی ہے جو میری مدد کرے؟"

پورا جنگل اس آواز سے گونج اٹھا! مس بیری کے ہاتھ سے پھلوں کی ٹوکری گرتے گرتے بچی۔ وہ بولیں: "ارے! یہ تو ببلو کیلے کی آواز ہے، لیکن ایسا لگ رہا ہے جیسے وہ الٹا لٹکا ہوا ہے!"

لُومی خرگوش مس بیری کے پیچھے سے بولی: "الٹا؟ بھلا کیلے بھی کبھی الٹے لٹکتے ہیں؟"

مائلو بندر ٹہنی سے کودا: "واہ! صبح کی شروعات ایسی ہی دھماکے دار ہونی چاہیے!"

گِگلز گلہری  ہنستے ہوئے بولی: "پکا ببلو نے پھر کوئی شرارت کی ہوگی!"

دانشمند ہُدہُد بولا: "پہلے چلو اور دیکھو کہ ہوا کیا ہے۔"

جنگل کا راجہ لِیو شیر آگے بڑھا: "سب میرے ساتھ چلو، کوئی اکیلا نہیں جائے گا!"

ندی کے پاس عجیب منظر!

جب سارے دوست پرانے آم کے درخت کے پاس پہنچے تو حیرت سے رک گئے!

ہمارے بَبلو کیلا میاں درخت سے بالکل الٹے لٹکے ہوئے تھے! ان کا منہ نیچے، پاؤں اوپر، اور چھلکا ایک ہری بیل سے بندھا ہوا تھا۔ پریشانی سے ان کا چہرہ لال ہو چکا تھا۔

"اوہ! شکر ہے تم لوگ آ گئے!" ببلو روہانسی آواز میں بولا، "میرا سارا گودا میرے سر میں جمع ہو گیا ہے، مجھے جلدی سے نیچے اتارو!"

گِگلز گلہری ہنستے ہنستے گھاس پر گر گئی: "تم تو بالکل الٹے لٹکے ہوئے چمگادڑ لگ رہے ہو!"

مس بیری نے پوچھا: "ببلو بیٹا! یہ سب کیسے ہوا؟"

ببلو نے آنکھیں مٹکائیں: "وہ… اصل میں… میں صبح کی ورزش کر رہا تھا! میں اس جنگل کا سب سے فٹ پھل بننا چاہتا تھا!"

لِیو شیر نے بھنویں اچکائیں "اور فٹ بننے کے لیے تم نے خود کو الٹا لٹکا لیا؟"

ببلو شرما کر بولا: "لگتا ہے میں نے احتیاطی تدابیر والا صفحہ پڑھا ہی نہیں تھا!"

اب کیا ہوگا؟

مس بیری نے بیل کھولنے کی کوشش کی لیکن وہ بہت سخت تھی۔

گِگلز گلہری تیزی سے درخت پر چڑھ گئی "میں گانٹھیں کھولنے میں ماہر ہوں!"

"گِگلز، رکو…!" مس بیری چلائیں۔

لیکن دیر ہو چکی تھی! گِگلز نے جیسے ہی بیل کو کھینچا، آم کے درخت کی ٹہنی زور زور سے ہلنے لگی۔ اب بَبلو میاں گول گول گھومنے لگے جیسے کوئی جھولا ہو!

"ارے باپ رے! بچاؤ! میں کوئی جھولا نہیں ہوں، مجھے چکر آ رہے ہیں!" ببلو چیخا۔

لُومی خرگوش نے آنکھوں پر ہاتھ رکھ لیے: "مجھ سے تو دیکھا ہی نہیں جا رہا!"

ٹہنی سے کڑ کڑ کی آواز آئی!

لِیو شیر نے فوراً حکم دیا: "گِگلز، نیچے آؤ، جلدی!" گِگلز نیچے اتری اور ٹہنی ٹوٹنے سے بچ گئی۔ سب نے سکون کا سانس لیا۔

ایک زبردست پلان!

ہُدہُد نے کہا: "ہمیں پریشان ہونے کے بجائے ایک اچھا سا پلان بنانا ہوگا۔"

مس بیری مسکرائیں: "چلو، سب مل کر کام کرتے ہیں!"

• مائلو بندر ندی کے پاس سے ایک نرم والی بیل لے آیا۔
• لُومی خرگوش ببلو سے باتیں کر کے اس کا ڈر کم کرنے لگی: "ببلو، لمبی سانس لو۔ ناک سے اندر، منہ سے باہر!"
• گِگلز  نے لطیفہ سنایا: "ببلو! وہ کون سا کیلا ہے جو اوپر کے بجائے نیچے دیکھتا ہے؟"

ببلو بولا: "میں… یعنی الٹا لٹکا ہوا ببلو!" (سب کھلکھلا کر ہنس پڑے)

اب اصل کام شروع ہوا!

لِیو شیر   نیچے مضبوطی سے کھڑا ہو گیا۔ ہُدہُد نے اپنی چونچ سے بیل کی گانٹھ کو آہستہ آہستہ کاٹنا شروع کیا۔

مائلو نے نرم بیل سے سہارا دیا اور جیسے ہی گانٹھ کھلی— "ٹَپ!"

لِیو شیر نے ببلو کو بہت آرام سے اپنے مضبوط ہاتھوں میں سنبھال کر گھاس پر سیدھا کھڑا کر دیا!

"ہُرّے! میں آزاد ہو گیا!"

ببلو خوشی سے ناچنے لگا! اس نے سب کو گلے لگایا، یہاں تک کہ آم کے درخت کو بھی جادو کی جپھی ڈالی: "شکریہ درخت میاں!"

 مزیدار ناشتہ اور پیارا سبق

مس بیری نے ببلو کو ٹھنڈا پانی پلایا! ببلو مسکرا کر بولا:

"مجھے سمجھ آ گئی کہ بغیر سوچے سمجھے اور بغیر بڑوں کی مدد کے کوئی نیا کام کرنا کتنا خطرناک ہو سکتا ہے۔"

مائلو نے سمجھایا: "ورزش کرنا اچھی بات ہے، لیکن پہلے سیکھنا چاہیے!"

مس بیری نے پیار سے ہاتھ پھیرا: "ببلو، تمہیں کسی کے سامنے خود کو بہترین ثابت کرنے کی ضرورت نہیں ہے۔ ہم تم سے ویسے ہی بہت پیار کرتے ہیں جیسے تم ہو۔"️

مس بیری نے ٹوکری اٹھائی: "چلو سب دوستو! ناشتہ تیار ہے!" 

سب دوست ہنستے کھیلتے ناشتے کی طرف چل دیے!

کہانی کا پیارا سبق

۱. بغیر سوچے سمجھے یا بڑوں سے پوچھے بغیر کوئی نیا کام کرنا خطرناک ہو سکتا ہے۔

۲. ہمیں خود کو بہتر ثابت کرنے کے لیے کسی خطرناک مقابلے کی ضرورت نہیں، ہمارے اپنے اور دوست ہمیں ویسے ہی پسند کرتے ہیں جیسے ہم ہیں۔

 چلو اب بات کرتے ہیں!

پیارے بچو! ببلو صحت مند تو بننا چاہتا تھا لیکن وہ اپنی حفاظت (Safety) کرنا بھول گیا۔ آپ کے خیال میں الٹی پلٹی ورزش کرنے سے پہلے ببلو کو کیا کرنا چاہیے تھا؟ سوچیں اور اپنے گھر والوں یا دوستوں کو بتائیں!

آپ کی رائے

آپ کو آج کی کہانی کیسی لگی؟آپ کو سب سے پیارا یا مزاحیہ حصہ کون سا لگا؟ اپنی رائے اور پسندیدہ لمحہ ضرور شیئر کریں۔

اب اگلی قسط میں پڑھیے کہ  اس میں کیا ہوتاہے۔